ចោលដឹងទាំងដង
និយមន័យៈ សម្ដីអសុរោះ និងអសីលធម៌ ។ អត្ថាធិប្បាយ អត្ថានុរូប «ដឹង»
គឺជាឧបករណ៍សម្រាប់ចាំងឈើម្យ៉ាង ដែលមានផ្លែរាងដូចពូថៅ
តែនៅទទឹងដង
និងមានកន្ទុយវែងឡើងលើសម្រាប់ជាជំនួយយោលយោគនៅពេលគេចាំងឈើ ។
ដោយសារវាមានកន្ទុយវែងយ៉ាងនេះ កាលបើគេចោលវាទៅមុខ
វាមិនរត់ចំគោលដៅទេ ។ វាផ្លាតទៅឆ្វេង ទៅស្ដាំ ពុំប្រាកដ
ជួនកាលទៀត វាចង់ឡងមករកម្ចាស់វិញផង ។ អត្ថប្បដិរូប
មនុស្សខ្លះមានសម្ដីរាងឈ្លើយៗ មិនប្រកបដោយសីលធម៌សោះ
គឺពោលពាក្យគំរោះគំរើយ ដែលគេតែងនិយាយថា កូនឥតពូជ
ឥតមានមេបាប្រដៅ ។ មនុស្សប្រភេទនេះ ពេលហានិយាយម្ដងៗ
ពុំបានគិតដល់ការគួរសម ឬពុំគួរនោះទេ ។ គេគ្មានស្គាល់ចាស់ទុំ
ព្រឹទ្ធាចារ្យអ្វីទេ គឺគេនិយាយបែបស្មើៗ និងរម៉ាំងរម៉ោក ។
ការនិយាយពាក្យគ្រោតគ្រាតបែបនេះ លោកពោលថា
សម្ដីនិយាយដូចគេចោលដឹងទាំងដង ។
No comments:
Post a Comment